Тошкентда рухсатсиз ўрнатилган реклама баннерлари олиб ташланди
0
Жумладан, Шайхонтоҳур туманининг марказий кўчаларида, шунингдек, Чилонзор тумани Фурқат кўчасида паспорт ва тегишли рухсатномаси мавжуд бўлмаган катта ўлчамли реклама баннерлари махсус ишчи гуруҳлар томонидан олиб ташланди. Бу ҳақда пойтахт ҳокимлиги матбуот хизмати маълум қилди.
Шаҳар маъмурияти тадбиркорлар ва реклама хизматлари кўрсатувчи ташкилотларга мурожаат қилиб, реклама қурилмалари жойлаштириш учун зарур бўлган тегишли рухсатномаларга эга бўлишни эслатди. Шу билан бирга, реклама конструкцияларини ўрнатишда пиёдалар ва автомобиллар ҳаракатини чеклаб қўймасликка, шаҳар эстетикаси ва йўл ҳаракати хавфсизлигига салбий таъсир кўрсатмасликка алоҳида эътибор қаратиш лозимлиги таъкидланди.
Ҳокимлик вакиллари шаҳардаги реклама объектларининг тартибли ва қонуний фаолиятини таъминлаш мақсадида мунтазам равишда текширув ишлари ўтказиб, қонун бузилиши ҳолатларига йўл қўйилмаслигини назорат қилиб боради.
Бундан ташқари, тадбиркорлардан реклама баннерлари ва конструкцияларини жойлаштириш бўйича мавжуд талабларга қатъий риоя этишлари сўралди.