Флик эҳтиёткор: «Барселона» чемпион бўлиши мумкин, лекин ҳали байрамга эрта!

Испания Ла Лигасида чемпионлик учун кураш қизғин паллага кирган бир пайтда, «Барселона» жамоаси бош мураббийи Ханс-Дитер Флик жиддий ёндашувни танламоқда. Унинг таъкидлашича, чемпионлик ҳақида олдиндан ўйлаб, байрам қилиш ҳақида гапириш ҳали ҳеч кимга фойда бермайди.

Каталония жамоаси 36-тур доирасида «Эспаньол»ни мағлуб этса, Испания чемпиони сифатида расман эълон қилинади. Аммо Флик ва унинг шогирдлари учун бу — фақатгина имконият, кафолат эмас.

«Ўйин олдидан байрам ҳақида ўйлаш ёки гапириш менимча мутлақо нотўғри. Ҳозирги энг муҳим нарса — бу уч очкони қўлга киритиш. Ҳамма нарсада ҳурмат ва профессионал ёндашув бўлиши керак. Биз фақат ўйинга диққат қаратишга мажбурмиз», — деди «Барселона» устози журналистлар саволига жавобан.

«Реал»нинг ўйини Фликни қизиқтиряптими?

Журналистлар томонидан берилган яна бир савол — «Реал Мадрид» ва «Мальорка» ўртасидаги баҳсни кузатасизми?» — деган саволга Флик шундай жавоб берди:

«Ҳозирча қарор қилганим йўқ. Аммо албатта натижадан хабардор бўламан. Биз эса ўз фронтимизда ишни аъло даражада бажаришимиз керак», — дея жавоб қайтарди немис мутахассиси.

Каталонияликлар чемпионлик остонасида

Айни вақтда «Барселона» 82 очко билан Ла Лиганинг пешқадами бўлиб турибди. «Реал Мадрид» эса 75 очко билан иккинчи ўринда. Агар «Реал» бугунги «Мальорка»га қарши ўйинда очко йўқотса, «Барселона» эртага «Эспаньол» устидан қозониладиган ғалаба билан чемпионликни расман қўлга киритади.

Сабр ва эҳтиёт — Флик услуби

Ханс-Дитер Фликнинг ёндашуви — ҳеч қандай шошма-шошарликсиз, эҳтиёткорлик ва профессионаллик асосида иш олиб бориш. Унинг бу позицияси жамоа ичидаги интизомни сақлаб, футболчиларни ортиқча босимдан ҳимоя қилмоқда.

Zamin.uz таҳририяти «Барселона» жамоасига яқиндаги ҳал қилувчи беллашувда омад тилайди. Чемпионликкача бор-йўғи бир қадам қолган, аммо футбол — бу кутилмаган бурилишлар ўйини экани ҳам ёддан чиқмаслиги лозим.