Эрон музокара таклиф қилмоқда, Исроил эса ҳужумга тайёрланмоқда

Яқин Шарқда кескинлик яна авж олмоқда. Эрон Ташқи ишлар вазири Аббос Арокчининг баёнотига кўра, Теҳрон ядровий қуролга эга бўлмасликни кафолатловчи халқаро битим тузишга тайёр. Унга кўра, агар Исроил Эрон ҳудудига ҳужумларини тўхтатса, Эрон ҳам ҳарбий жавоб ҳаракатларини тўхтатади.

Арокчи баёнотида Эрон минтақада барқарорликни сақлаш тарафдори эканини алоҳида таъкидлаб ўтди. Шу билан бирга, у ҳарбий можаролардан воз кечиш йўлида дипломатик музокараларни давом эттириш зарурлигини урғулади.

Бироқ ҳозирча Исроил томони бу таклифга расмий муносабат билдирмади. Аксинча, яҳудий кучлари Эрон ҳарбий инфратузилмаси яқинидаги ҳудудларда жойлашган ҳарбий ва фуқаролик объектларни тарк этишни қатъий талаб қилмоқда. Исроил армияси форс тилида ёзилган баёнот орқали, ҳар қандай ҳарбий объект яқинида бўлиш ҳаёт учун хавфли экани ҳақида огоҳлантирди.

“Ҳарбий қурол ишлаб чиқарувчи заводлар ва уларнинг атрофида жойлашган ҳар қандай шахслар бу ҳудудларни дарҳол тарк этишлари, шунингдек, кейинги буйруққача қайтмасликлари лозим. Бу жойларда бўлиш ҳаётингизни хавф остига қўяди”, — дейилади Исроил армиясининг ижтимоий тармоқлардаги расмий саҳифасида.

Минтақадаги ҳолат тобора мураккаблашар экан, халқаро кузатувчилар ҳар икки томоннинг қарорларини синчковлик билан кузатмоқда. Дипломатик йўл билан келишувга эришиш минтақа ва дунё тинчлиги учун муҳим аҳамият касб этади.

Zamin.uz таҳририяти воқеаларнинг ривожини диққат билан кузатишда давом этади ва сизни энг сўнгги янгиликлар билан хабардор қилиб боради.