Жозе Моуринью яна “Бенфика”га қайтишига катта эҳтимол бор

Футбол оламидан сенсацион янгилик: машҳур мураббий Жозе Моуринью тез орада Португалиянинг энг нуфузли клубларидан бири – “Бенфика”нинг бош мураббийи сифатида эълон қилиниши мумкин.

62 ёшли мутахассис Лиссабон жамоаси раҳбарияти билан келишувга эришгани айтилмоқда. Бу қарор клубнинг Чемпионлар лигаси 1-турида “Қарабах”га (2:3) мағлуб бўлганидан сўнг Бруну Лаж билан йўллари ажратилгани ортидан келди.

CNN Portugal тарқатган маълумотларга кўра, “Бенфика” ва Моуринью ўртасидаги музокаралар якуний босқичга кирди. Бу эса келишувга жуда яқин турилганини англатади.

Қизиғи шундаки, Жозе Моуринью август ойи охирида “Фенербахче”ни Чемпионлар лигаси плей-офф босқичида айнан “Бенфика”га қарши баҳсда (0:0, 0:1) мағлуб бўлгандан сўнг ишдан бўшатилган эди. Энди эса тақдир уни Лиссабон клуби бошқарувига олиб келиши мумкин.

Эслатиб ўтамиз, машҳур мураббий илк бор “Бенфика”ни 2000 йил сентябрдан декабргача бошқарган. Шундан сўнг унинг мураббийлик йўли Европа футболида буюк саҳифалар очди.

Агар бу сафар ҳам Моуриньюнинг қайта келиш сценарийи амалга ошса, Лиссабон клубини янги босқич кутиши турган гап.