Ўғрилар Бристол музейидан 600 дан ортиқ ашёни ўғирлаб кетишган
Эйвон ва Сомерсет полицияси Бристол музейи омборхонасида содир бўлган маданий бойликларнинг йирик ўғирланишини тергов қилмоқда. Жиноятчилар Британия империяси ва Ҳамдўстлик тарихига оид 600 дан ортиқ артефактларни ўғирлашди, деб хабар беради CNN.
Жиноят 25 сентябрь куни эрта тонгда содир этилган, бироқ ҳуқуқ-тартибот идоралари ходимлари қидирувдаги тўрт кишининг суратларини эълон қилиб, жамоатчиликдан ёрдам сўраган. Терговчиларнинг сўзларига кўра, ўғирланган буюмлар "муҳим маданий қиймат"га эга бўлиб, уларнинг аксарияти музейга совға қилинган.
Детектив констебл Ден Бурган бу ҳодисани шаҳар учун жиддий зарба деб атади: "Катта маданий аҳамиятга эга бўлган жуда кўп буюмларнинг ўғирланиши Бристол учун катта йўқотишдир. Ушбу артефактлар бизга Британиянинг мураккаб, кўп қатламли тарихини тушунишга ёрдам берадиган тўпламнинг бир қисмидир ва биз жамоатчилик бизга айбдорларни аниқлашда ёрдам беришига умид қиламиз."
Би-би-си маълумотларига кўра, йўқолган буюмлар орасида Ост-Индия компанияси давридаги ҳарбий нишонлар ва тўғноғичлар, заргарлик буюмлари, ўйма ҳайкалчалар ва бошқа безак буюмлари бор.