Янги рекорд: АҚШда 1,8 млрд доллар миқдордаги жекпот ўйналди

АҚШда Рождество байрами куни мамлакат лотереялари тарихидаги энг шов-шувли воқеалардан бири содир бўлди. Powerball лотереясида тикилган жекпот 1 миллиард 817 миллион долларга етди ва бу улкан сумма Арканзас штатидан сотиб олинган ягона чипта соҳибига насиб қилди.

Қайд этилишича, мазкур ютуқ АҚШ лотереялари тарихидаги тўртинчи энг катта жекпот сифатида қайд этилди. Бу эса Powerball ўйинларига бўлган қизиқиш ва иштирокчилар сони қанчалик юқори эканини яна бир бор кўрсатиб берди.

Ғолиб пулни қандай шаклда олишни ўзи танлайди. Агар у бир марталик тўлов вариантини маъқул кўрса, федерал солиқлар ушлаб қолинганидан сўнг тахминан 835 миллион доллар қўлига тегади. Бу ҳам ҳар қандай ҳолатда ҳаётни тубдан ўзгартиришга етарли маблағ ҳисобланади.

Мутахассисларнинг таъкидлашича, ушбу лотереяда ғалаба қозониш эҳтимоли жуда паст — 292 миллиондан 1 та. Шунга қарамай, жекпот кетма-кет 46 та тираж давомида ўйналмай қолгани сабабли сумма босқичма-босқич ошиб борди. Сўнгги кунларда эса байрам муносабати билан билетларга бўлган талаб кескин ортди.

Powerball лотереяси АҚШнинг 45 та штатида ўтказилади ва ҳар бир билет нархи атиги 2 долларни ташкил қилади. Ҳозирча омадли чипта эгасининг исми ошкор этилмади, фақатгина у Арканзас штати ҳудудида сотиб олингани маълум.

Шубҳасиз, бу ютуқ нафақат ғолиб учун, балки бутун мамлакатда лотереялар тарихида қоладиган воқеага айланди. Рождество байрами эса ким учундир чин маънода унутилмас кун бўлди.