Ноланнинг “Одиссея” трейлери бир кунда 121 млн марта кўрилди (трейлер)
2025 йил 25 декакабр куни афсонавий режиссёр Кристофер Нолан томонидан суратга олинган янги “Одиссея” фильмининг илк трейлери ижтимоий тармоқларда ҳақиқий портлаш қилди. Бир сутка ичида видеоролик 121 миллиондан ортиқ марта томоша қилинди. Бу ҳақда Forbes нашри WaveMetrix маълумотларига таяниб хабар берди.
Бу натижа Ноланнинг олдинги мегалойиҳаси — “Оппенҳеймер” трейлерининг биринчи суткадаги кўрсаткичидан қарийб икки баробар юқори. Шу тариқа, “Одиссея” 2025 йилда Universal Pictures студияси учун энг оммабоп трейлерга айланди. Қисқаси, интернет Нолан эффектини яна ҳис қилди.
Томошаларнинг энг катта улуши TikTok платформаси ҳиссасига тўғри келди — 27 фоиз. Кейинги ўринларда YouTube, Facebook, Instagram ва X жойлашди. Бу эса фильмга қизиқиш фақат кино мухлислари билан чекланиб қолмаганини кўрсатади.
Фильм сюжетининг асоси қадимги юнон шоири Гомернинг машҳур “Одиссея” достонига бориб тақалади. Картинада Троя уруши якунланганидан кейин қаҳрамон Одиссейнинг узоқ ва хавфли уйга қайтиш саёҳати тасвирланади. Асосий ролни Мэтт Деймон ижро этган.
Шу билан бирга, фильм актёрлар таркиби ҳам алоҳида эътиборга лойиқ. Лойиҳада Энн Ҳетуэй, Том Холланд, Зендея, Роберт Паттинсон, Люпита Нионго ва Шарлиз Терон каби юлдузлар иштирок этган. Бундай каст — бу аллақачон муваффақият формуласи.
Маълум қилинишича, фильм бюджети тахминан 250 миллион доллар атрофида баҳоланмоқда. Картинанинг расмий премьераси 2026 йил 17 июлга режалаштирилган бўлса-да, чипталар намойишга бир йил қолганидаёқ сотувга чиқарилган. Бу эса студиянинг фильмга бўлган ишончи ниҳоятда юқори эканини кўрсатади.
Қисқа қилиб айтганда, “Одиссея” ҳали экранларга чиқмасиданоқ тарих ёза бошлади. Агар трейлер шунча шов-шув қилган бўлса, фильмнинг ўзи нима қилажагини тасаввур қилиш қийин эмас.