Маколей Калкин “Уйда ёлғиз”дан кейин нега кинони тарк этганини очиқ изоҳлади

Маколей Калкин 1990 йиллар бошида “Уйда ёлғиз” ва унинг давомлари орқали жаҳонга машҳур бўлганидан сўнг нега актёрлик фаолиятидан узоқлашганини очиқ изоҳлади. Ҳозир 45 ёшда бўлган Калкиннинг айтишича, у шон-шуҳрат эмас, оддий болалик ва тенгдошлари билан эркин ҳаётни танлаган.

Актёр Mythical Kitchen подкастида болаликдаги съёмкалар кўпчилик ўйлагандек жамоавий жараён бўлмаганини таъкидлади.

“Аксар лойиҳаларда якка ҳолда ишлаганман. Съёмка пайтида ўзимни доим ёлғиз ҳис қилардим”, дейди у. Калкин ҳатто “Уйда ёлғиз”ни қайта кўрганда ўзини кимсасиз оролга тушгандек ҳис қилишини ҳазиломуз тарзда айтган.

1994 йилдаги “Бойвачча Рич” фильми ортидан у Голливуддан бутунлай кетишга қарор қилади. Ўша пайтда дунёдаги энг машҳур бола актёрлардан бири бўлса-да, Калкин оддий ҳаёт — дўстлар, учрашувлар ва болаларга хос тажрибаларни муҳим деб билганини айтади.

“Кейинроқ шу нарсаларни ўтказиб юборганимни англадим”, дея эслайди у.

Калкин машҳурликни “тишим пастаси”га қиёслаб, уни қайтариб бўлмас жараён деб таърифлайди. Шу билан бирга, у ҳеч қачон атайлаб таниқли бўлишни истамаганини, актёрликка кириб келиши тасодифий бўлганини ҳам қайд этди.

Аввалроқ у Кевин Маккалистер образига қайтиш таклиф қилинса, яхши сценарий бўлса, рози бўлишини айтган. Калкин ҳатто эҳтимолий давом ҳақида ғоясини ҳам бўлишган: унда вояга етган Кевин оталик муаммолари билан юзлашади, уй эса бузилган муносабатлар рамзига айланади.

Ҳозирда актёр асосий эътиборини оиласига қаратган. У актриса Бренда Сонг билан икки нафар ўғлини тарбияламоқда ва камералардан йироқ, хотиржам ҳаёт кечиришни афзал кўради.