Тошкентда фильтрсиз иссиқхоналар ёпилади

Тошкент ва Тошкент вилоятида кўмир билан иситиладиган, лекин фильтрсиз ишлаётган иссиқхоналар ёпилиб, пойтахт атрофидан чиқарилади. Бу ҳақда президент Шавкат Мирзиёев Олий Мажлис ва Ўзбекистон халқига қилган йиллик мурожаатида маълум қилди.

Давлат раҳбари бу қарорни экологик вазиятни яхшилашга қаратилган тизимли чораларнинг бир қисми сифатида тақдим этди. Президент ўз нутқида экологик мувозанатни таъминлаш, яшил энергетика ва сув ресурсларидан оқилона фойдаланишни асосий устувор йўналишлардан бири сифатида қайд этди.

Расмий маълумотларга кўра, Тошкент ва Тошкент вилоятида бугунги кунда тахминан икки мингта иссиқхона фаолият юритади, улар иситиш учун кўмир ва газдан фойдаланади. Уларнинг кўп қисми фильтрсиз кўмир қозонхоналарида ишлайди, бу эса айниқса куз-қиш мавсумида ҳаво сифатига салбий таъсир кўрсатади.

Шу сабабли фильтрсиз ишлайдиган қозонхоналардан фойдаланиш бутунлай тўхтатилади. Бундай иссиқхоналар пойтахт атрофидан кўчирилади ва иситиш марказлашган қозонхоналар орқали ташкил этилади.

Иссиқхона хўжаликларини жойлаштириш учун 200 гектардан ортиқ майдонда агрокластерлар ташкил этилади. Ушбу кластерларга қўшилишни истаган иссиқхоналарга алоҳида субсидиялар ажратилади.

Бундан ташқари, йирик корхоналар учун 100 миллион доллар миқдорида кредит линияси очилади. Ушбу маблағлар фильтрлар, тозалаш иншоотлари ва зарарли моддалар чиқиндиларини мониторинг қилиш станцияларини ўрнатишга йўналтирилади.

Эслатиб ўтамиз, Тошкент туманида 10 та иссиқхона кўмир тутуни билан ҳавони ифлослантиргани аниқланган эди — текширувлар натижасида хўжаликлар дарҳол тўхтатилиб, қатъий чоралар кўрилган эди.