Cyberpunk давоми куттиради: CD Projekt RED эҳтиёткор режада

Польшада жойлашган машҳур студия CD Projekt RED томонидан ишлаб чиқилаётган Cyberpunk 2077 ўйинининг давомий қисми яқин йилларда чиқмаслиги мумкин. Noble Securities таҳлилчилари баҳосига таянган ҳолда Strefa Inwestorow портали хабарига кўра, янги қисм 2030 йилдан олдин тақдим этилмайди.

Таҳлилчилар фикрича, релиз санасининг орқага сурилиши тасодифий эмас. Ишлаб чиқувчилар бу сафар шошилмасдан, ўйинни техник жиҳатдан пухта ҳолатга келтиришни мақсад қилган. Хусусан, давомий қисмда кўп фойдаланувчи режими (multiplayer) тўлиқ ишлаб чиқилиб, асосий ўйин механикасига органик тарзда қўшилиши кутилмоқда.

Шу билан бирга, янги Cyberpunk айнан биринчи қисм чиқарилганига ўн йил тўлиши муносабати билан тақдим этилиши мумкинлиги ҳам тахмин қилинмоқда. Бу эса лойиҳани нафақат техник, балки рамзий жиҳатдан ҳам муҳим қилади.

Маълумот учун, Cyberpunk 2077 илк бор 2012 йилларда ишлаб чиқила бошланган ва релиз санаси бир неча бор кўчирилган. Аввалига 2019 йилда чиқиши режалаштирилган ўйин охир-оқибат 2020 йил ноябрида сотувга чиқарилди. Бироқ релиздан кейин юзага келган жиддий техник муаммолар, айниқса консол версиялардаги хатолар, катта танқид ва жанжалларга сабаб бўлган эди.

Айнан шу салбий тажриба студияни янги лойиҳаларда анча эҳтиёткор ва босқичма-босқич иш олиб боришга мажбур қилгани таъкидланмоқда. CD Projekt RED бу сафар сифатни биринчи ўринга қўймоқчи.

Шу орада студия бошқа машҳур франшизани ҳам унутгани йўқ. 2026 йилда The Witcher 3: Wild Hunt учун пуллик сюжетли қўшимча чиқариш режалаштирилган. Ушбу қўшимча 2015 йилда чиққан ўйин воқеаларини янги The Witcher 4 билан боғлаб беришни мақсад қилади.

“The Witcher” сериясининг тўлиқ янги қисми эса, дастлабки режаларга кўра, 2027 йил охирида ўйин мухлислари эътиборига ҳавола этилади. Шу тариқа, CD Projekt RED яқин ўн йилликда йирик релизларни шошилмасдан, лекин пухта режа асосида тақдим этиш йўлини танлаётгани кўриниб турибди.