Жаҳон чемпионати-2026 чипталарига талаб тарихий рекорд ўрнатди
Футбол оламининг энг катта байрами — 2026 йилги Жаҳон чемпионатига қизиқиш мисли кўрилмаган даражага чиқди. Бу ҳақда ФИФА президенти Жанни Инфантино расман маълум қилди.
Унинг сўзларига кўра, мусобақанинг гуруҳ босқичи ўйинлари учун чипталарни сотиб олишга бўлган талаб аллақачон рекордни янгилаган. Инфантино таъкидлашича, ҳозирнинг ўзида ФИФАга 150 миллиондан ортиқ ариза келиб тушган.
«Атиги 15 кун ичида бутун дунё бўйлаб Жаҳон чемпионати чипталарини харид қилиш истагида 150 миллиондан зиёд сўров олдик. Олдиндан рўйхатдан ўтиш жараёнида ҳар куни ўртача 10 миллионта ариза қайд этилди. Бу — футбол тарихида мисли кўрилмаган кўрсаткич», — деди Инфантино.
ФИФА раҳбарига кўра, чипталарга энг катта қизиқиш АҚШ, Германия ва Буюк Британия мухлислари томонидан билдирилган. Бу эса мусобақанинг глобал миқёсда қанчалик катта аҳамият касб этаётганини яққол кўрсатади.
Эслатиб ўтиш жоиз, 2026 йилги Жаҳон чемпионати илк бор бир вақтнинг ўзида уч давлат — АҚШ, Мексика ва Канада майдонларида ўтказилади. Турнирда жамоалар сони ҳам оширилиб, 48 та терма жамоа иштирок этади.
Мутахассислар фикрича, иштирокчилар сонининг кўпайиши, стадионлар географиясининг кенгайиши ва футболга бўлган умумжаҳон қизиқиш Жаҳон чемпионати-2026’ни тарихдаги энг оммавий мусобақага айлантириши мумкин. Чипталарга бўлган улкан талаб эса бу прогнозлар бежиз эмаслигини кўрсатяпти.