Садир Жапаров нимага Атамбаевнинг барча унвонларини бекор қилди?

Қирғизистон Республикасининг собиқ президенти Алмазбек Атамбаев барча давлат мукофотларидан расман маҳрум этилди. Тегишли фармон мамлакат президенти Садир Жапаров томонидан имзоланди.

Президент администрацияси матбуот хизматининг маълум қилишича, ушбу қарор 2025 йил 3 июнь куни Бишкек шаҳрининг Первомай туман суди томонидан чиқарилган ҳукмга асосланган. Фармон Қирғизистон Конституцияси ҳамда “Қирғизистон Республикасининг давлат мукофотлари, фахрий унвонлари ва мукофот пуллари тўғрисида”ги қонун талаблари асосида қабул қилинган.

Ҳужжатга мувофиқ, Алмазбек Атамбаев қуйидаги мукофотлардан маҳрум қилинди:

— “Қирғизистон Республикасининг Қаҳрамони” олий унвони;

— II даражали “Манас” ордени;

— “Данакер” ордени;

— “Данк” медали.

Шунингдек, 1999–2017 йиллар оралиғида мазкур мукофотларни бериш бўйича чиқарилган бир қатор президент фармонлари ҳам ўз кучини йўқотган деб топилди.

Мазкур қарор Қирғизистонда собиқ юқори мартабали амалдорларнинг ҳуқуқий жавобгарлиги масаласида муҳим ҳаракат сифатида баҳоланмоқда. Келгусида ушбу иш атрофида сиёсий ва жамоатчилик муҳокамалари давом этиши кутилмоқда.