Саудия Арабистони Ямандаги портга ҳаводан зарба берди
30-декабрь куни Саудия Арабистони Яманнинг жанубида жойлашган Мукалла портига ҳаво зарбаси берди. Саудия томони ҳужум айирмачи кучлар учун қурол-яроғ олиб келингани билан боғлиқ эканини билдирди. Мазкур қуроллар Бирлашган Араб Амирликларининг Фужайра портидан келган кемалар орқали етказилгани айтилмоқда.
Саудия давлат ахборот агентлиги хабарига кўра, портга етказилган қурол ва ҳарбий техникалар минтақа хавфсизлигига таҳдид солган. Шу сабабли коалиция ҳаво кучлари чекланган ҳарбий операция ўтказган. Ҳарбийлар зарба тунда берилганини ва тинч аҳоли зарар кўрмаслиги учун чоралар кўрилганини маълум қилди.
Ҳозирча ҳужум оқибатида ҳалок бўлганлар ҳақида маълумот йўқ. Айрим манбаларга кўра, зарба “Греэнланд” номли юк кемаси билан боғлиқ бўлиши мумкин. Кема аввал Фужайра портида бўлгани, кейин эса Мукаллага келгани қайд этилмоқда. БАА расмийлари ҳозирча мазкур воқеа юзасидан изоҳ бермади.
Мазкур ҳолат Саудия Арабистони ва БАА ўртасидаги муносабатларда кескинлик кучайганини кўрсатмоқда. Мутахассислар бу ҳолат Ямандаги вазиятни янада мураккаблаштириши мумкинлигини билдирмоқда.