Темур Кападзе жаҳоннинг энг кучли мураббийлари ТОП-10 талигида қайд этилди
Ўзбекистон миллий жамоасининг собиқ бош мураббийи Тимур Кападзе 2025 йил якунларига кўра дунёдаги энг кучли миллий терма жамоа мураббийлари рейтингида юқори натижа қайд этди. Халқаро футбол тарихи ва статистикаси федерацияси (IFFHS) томонидан эълон қилинган рўйхатда у саккизинчи ўринни эгаллади.
Маълум қилинишича, Кападзе 10 очко жамғариб, Колумбия миллий жамоаси бош мураббийи Нестор Лоренсо билан бир хил натижа кўрсатди. Бу эса ўзбекистонлик мутахассиснинг халқаро миқёсдаги нуфузи тобора ошиб бораётганидан далолат беради.
Рейтинг пешқадамини Испания терма жамоаси устози Луис де ла Фуэнте қўлга киритди. Ундан кейин Португалия миллий жамоаси бош мураббийи Роберто Мартинес ҳамда Аргентина терма жамоасини бошқараётган Лионель Скалони жой олди. Шунингдек, кучли ўнликка Норвегия, Англия, Франция, Марокаш ва Мексика миллий жамоалари мураббийлари ҳам киритилди.
Эслатиб ўтиш жоиз, аввалроқ Тимур Кападзенинг Индонезияда кўрингани ортидан унинг ушбу мамлакат миллий жамоасига ўтиши мумкинлиги ҳақида турли миш-мишлар тарқалган эди. Бироқ орқасидан бу гапларга аниқлик киритилиб, мутахассис расман “Навбаҳор” клубининг янги бош мураббийи сифатида таништирилди.
Бу натижа Кападзенинг фаолияти халқаро даражада ҳам юқори баҳоланаётганини яққол кўрсатиб турибди.