Талабалар учун контракт тўловини амалга ошириш муддати узайтирилди

Олий таълимда таҳсил олаётган талабалар учун тўлов-контракт маблағларини амалга ошириш муддати яна бир ойга яқин узайтирилди. Бу ҳақда Олий таълим, фан ва инновациялар вазирлиги расмий маълумот берди.

Маълум қилинишича, давлат комиссиясининг тегишли қарорига мувофиқ, 2025/2026 ўқув йили учун олий таълим муассасаларининг бакалавриат ва магистратура босқичларида таҳсил олаётган талабалардан тўловларни қабул қилиш ҳамда талабаликка қабул қилиш жараёнларини расмийлаштириш муддати 2026 йил 31 январга қадар, шу жумладан ушбу сана куни ҳам амал қиладиган тартибда узайтирилган.

Янги белгиланган муддатга кўра, қабул параметрлари доирасида ўқишга тавсия этилган абитуриентлар базавий тўлов-контракт шаклида бир йиллик ўқитиш қийматининг камида 50 фоизини тўлаши шарт. Шунингдек, табақалаштирилган тўлов-контракт, яъни “супер-контракт” асосида таҳсил олиш истагини билдирган талабгорлар ҳам улар учун белгиланган йиллик ўқитиш қийматининг камида ярмини амалга ошириши лозим бўлади.

Вазирлик эслатишича, амалдаги қоидаларга мувофиқ, иккинчи ва ундан юқори курсларда таҳсил олаётган талабалар учун контракт тўлаш муддатини олий таълим муассасаси раҳбари томонидан алоҳида тартибда узайтириш имконияти мавжуд.

Мазкур қарор талабалар ва уларнинг ота-оналари учун қўшимча енгиллик яратиб, янги ўқув йилига молиявий масалаларни хотиржам ҳал этишга хизмат қилиши кутилмоқда.