Тедеско жамоаси «Милан» ҳужумчиси Нкунку трансферини хоҳламоқда

«Милан» ҳужумчиси Кристофер Нкунку фаолиятини Туркияда давом эттириши мумкин. Бу ҳақда euro-football.ru хабар беради.

Sports Digitale журналисти Ягиз Сабунжуоглу хабарига кўра, «Фенербахче» миланликлар билан футболчини сотиб олиш бўйича расмий музокараларни бошлаб юборди. «Россонери» Нкунку учун 35 миллион евро талаб қилмоқда ва бу нархни пасайтириш ниятида эмас. Истанбул клуби эса суммани 35 миллиондан пастроқ қилишга уриниш учун келишув шартларини муҳокама қилмоқда.

Агар трансфер амалга ошса, «Фенербахче» бош мураббийи Доменико Тедеско (аввал «Спартак»ни бошқарган) Нкункуни марказий ҳужумчи сифатида ёки ҳужум ортида ҳаракатланадиган футболчи ролида ишлатишни режалаштирмоқда.

28 ёшли франсуз футболчи Нкунку жорий ёзда «Челси»дан «Милан»га 37 миллион евро эвазига кўчиб ўтган ва 2030 йил 30 июнгача мўлжалланган шартнома имзолаган. У бу мавсум «россонери» сафида 14 ўйинда майдонга тушиб, 1 гол урди ва 2 ассист қайд этди. Transfermarkt портали Нкункунинг бозор қийматини 32 миллион евро га баҳоламоқда.