"Сандерленд"нинг сирли қўрғони: Холанд гол уролмаган ягона АПЛ жамоаси

2026 йилнинг илк баҳсида “Манчестер Сити” Премьер-лигада янги чиққан “Сандерленд” майдонидан голсиз дуранг билан қайтди. “Шаҳарликлар” қанча уринмасин, таблода нол ўзгармади — ўйин 0:0.

Бу баҳсда эътибор яна бир бор Эрлинг Холандга қаратилди. Норвегиялик тўпурар учрашув давомида икки марта дарвоза сари зарба йўллади, аммо ҳужумлар манзилга ета олмади. Яъни, “Сити”нинг энг катта “қуроли” бу сафар ҳам ишламади.

Натижада “Сандерленд” Англия Премьер-лигасида Холандни тўлиқ тўхтатган ягона жамоа мақомини сақлаб қолди. Қизиғи, Холанд АПЛда тўқнаш келган бошқа 23 жамоанинг ҳар бирига камида биттадан гол уришга улгурган — аммо “Сандерленд”га қарши ҳали ҳам “қулф” очилмаган.

Эслатиб ўтамиз, “Сандерленд” мавсум бошланишидан олдин яна элитага қайтганди. Декабрь ойи бошида “Сити”га қарши аввалги тўқнашув 0:3 ҳисобида якунланган, лекин ўша ўйинда ҳам Холанд гол урмаган эди.

Қисқаси, “Сандерленд” учун бу — катта плюс: икки ўйин, ноль гол. “Сити” учун эса бир савол яна қаттиқроқ янграйди: Холандни бу “қўрғон”га қарши қандай очиш мумкин?