Янги Тошкент кампусига 200 млн доллар йўналтирилади
Янги Тошкентни кенгайтириш бўйича йирик стратегия доирасида шаҳар Дирекцияси таълим кластери қурилишини назорат қилмоқда. Лойиҳанинг марказий нуқтаси — 2021 йилдан бери фаолият юритаётган “Янги Ўзбекистон” университети бўлиб, кампус учун 200 миллион доллар ажратилиши айтиилмоқда. Бу ҳақда upl.uz хабар беради.
Расмий маълумотларга кўра, университет ихтиёрига 50 гектарлик ҳудуд берилади. Бу ерда 10 минг талаба таълим олиши учун тўлиқ академик инфратузилма барпо этилиши кўзда тутилган.
Қурилиш ишларини туркиялик пудратчи Ўзгъвен компанияси олиб бормоқда. Тасдиқланган режага кўра, бутун мажмуа 2027 йилда фойдаланишга топширилиши режалаштирилган.
Архитектура концепциясида бешта факультет биноси, ректоратнинг маъмурий корпуси, шунингдек, музей ва кўргазма заллари қурилиши бор. Ўқув жараёнини кучайтириш учун мультимедиа хоналари жиҳозланади, бир вақтнинг ўзида мингдан ортиқ ташрифчини қабул қила оладиган кутубхона ҳам ташкил этилади.
Кампуснинг ижтимоий қисми ҳам спорт руҳи билан бойитилади: 2 минг кишига мўлжалланган турар жойлар, ошхоналар, сузиш ҳавзаси ва 1 минг ўринли спорт мажмуаси қурилиши режалаштирилган.
Университет шаҳарчаси ёнида, қарийб 4 гектар майдонда Ўзбекистон Миллий кутубхонасининг янги биноси ҳам қад ростламоқда. Тўрт қаватли иншоотнинг умумий майдони 30 минг квадрат метрдан ошади, лойиҳа эса миллий меъморчилик анъаналари ва замонавий шаҳарсозлик ечимларини уйғунлаштиришга таянади.
Кутубхонада китоб фондини стерилизация қилиш, ҳисобга олиш ва хавфсиз сақлаш учун юқори технологияли хоналар бўлиши кўзда тутилган. Инфратузилма бир вақтнинг ўзида 1420 нафар ўқувчига хизмат кўрсатади, шунингдек, халқаро ва миллий электрон базаларга онлайн кириш имконияти ҳам тақдим этилади.
Лойиҳада инклюзив муҳит масаласи ҳам инобатга олинган: кўришда муаммоси бор фуқаролар учун тадқиқот ва ўқиш зоналари алоҳида ташкил этилади. Ташриф буюрувчилар учун галерея, 300 ўринли кафе, очиқ спорт майдончалари ва дам олиш ҳудудлари ҳам режалаштирилган.
Янги Миллий кутубхона лойиҳасида RFID технологиясига асосланган “ақлли” жавонлар ҳам бўлади. Бу тизим 30 минг квадрат метрдан ортиқ архивларда исталган китобнинг жойлашувини реал вақт режимида аниқлашга ёрдам бериб, ноёб нашрларни топишда инсон омилига боғлиқликни камайтиради.