Ўзбекистонда коррупция ҳақида хабар берганлар ҳимоя ордери билан қўллаб-қувватланади
Ўзбекистонда коррупция ҳолатлари ҳақида маълумот берган фуқароларни тазйиқ ва таъқиблардан асраш учун ҳимоя ордери жорий этилмоқда. Бу тартиб коррупциянинг олдини олиш ва унга қарши кураш тизимини такомиллаштиришга қаратилган президент фармонида белгиланди. Бу ҳақда podrobno.uz хабар беради.
Ҳужжатга кўра, Коррупцияга қарши курашиш агентлиги коррупция бузилишлари тўғрисида хабар берган шахсларга ҳимоя ордери беради. Мазкур механизм уларни иш фаолияти жараёнида босим ўтказиш ва таъқиб қилиш ҳолатларидан ҳимоялашга хизмат қилади.
Шунингдек, коррупцияга қарши курашга ҳисса қўшганларни рағбатлантириш мақсадида “Коррупцияга қарши курашга қўшган ҳисса учун” кўкрак нишони таъсис этилмоқда.
2026 йил июнигача Агентлик Рақамли технологиялар вазирлиги, Бош прокуратура, Ички ишлар вазирлиги, Давлат хавфсизлик хизмати ҳамда Иқтисодиёт ва молия вазирлиги билан бирга рағбатлантириш тизимини тартибга солувчи норматив-ҳуқуқий ҳужжат лойиҳасини ишлаб чиқади. Унда “E-Anticor.uz” платформасини Жанубий Кореянинг Clean Portal тажрибаси асосида модернизация қилиб, рағбатлантириш тизимини рақамлаштириш, жумладан ҳуқуқбузарликлар ҳақида хабар берганларни қўллаб-қувватлаш назарда тутилади. Бундан ташқари, рағбатлантириш масалаларида Агентликка мувофиқлаштирувчи орган мақомини бериш ҳамда тизимни Жамоатчилик назоратини ривожлантириш жамғармаси орқали йўлга қўйиш режалаштирилган.
2026 йил 1 июлдан “Рақамли комплаенс” ахборот-дастурий мажмуасини синов тариқасида ишга тушириш кўзда тутилган. У коррупциянинг олдини олиш кластери иштирокчилари ўртасида тезкор ахборот алмашинувини таъминлаши, ички антикоррупция бўлинмалари ишини “E-Комплаенс” модули орқали тўлиқ рақамлаштириши керак.
Фармон Агентликка давлат органлари ва ташкилотларига қоидабузарликларнинг олдини олиш ҳамда уларни бартараф этиш бўйича кўриб чиқилиши мажбурий бўлган тавсия ва таклифларни киритиш ҳуқуқини ҳам беради.
Эслатиб ўтамиз, Ўзбекистонда коррупциянинг олдини олиш бўйича кластер ишлаш тартиби ҳам тасдиқланган. Ушбу тизим давлат идоралари, ҳуқуқни муҳофаза қилувчи тузилмалар, фуқаролик жамияти институтлари ва илмий ташкилотлар ўртасида коррупцияга қарши йўналишда изчил ҳамкорликни йўлга қўйишга қаратилган.