Хаби Алонсо Ла Лигада «Барселона» билан пойга ҳақида гапирди

Мадриднинг «Реал» жамоаси бош мураббийи Хаби Алонсо Ла Лигадаги чемпионлик пойгаси ва «Барселона» билан рақобат ҳақида фикр билдирди. Бу ҳақда euro-football.ru хабар беради.

Якшанба куни «қаймоқранглилар» «Бетис»ни 5:1 ҳисобида тор-мор этиб, турнир жадвалида «Барселона»дан орқада қолаётган фарқни яна 4 очкогача қисқартирди. Бир кун аввал эса каталонияликлар «Эспанол»ни 2:0 ҳисобида мағлуб этганди.

«Кеча “Барселона” ғалаба қозонди, биз эса ҳали кўп ўйинларда ютишимиз керак. Ҳозир бизда 45 очко бор, мақсадимиз — 90 очкога етиш. Олдиндаги учрашувларга қараб, жуда кескин кураш бўлиши кўриниб турибди», — деди Алонсо матбуот анжуманида.

8-январ куни «Реал» Испания Суперкубоги иккинчи ярим финалида «Атлетико»га қарши майдонга тушади. Илк финалчи 7-январ куни «Барселона» — «Атлетик» (Бильбао) баҳсида аниқланади.