Disney мультфильми «Зверополис 2» касса йиғими рекорд ўрнатди

Disney’нинг “Зверополис 2” мультфильми кинотеатрларда миллионлаб доллар йиғишда давом этмоқда. Фильмнинг глобал касса йиғими 1,588 миллиард долларга етди ва яқин кунларда 1,6 миллиардлик маррани ҳам ортда қолдириши кутилмоқда. Шу тариқа у Disney тарихидаги энг кўп даромад келтирган анимацион лойиҳа мақомини эгаллади. Бу ҳақда playground.ru хабар беради.

Давомий қисм айниқса Хитой бозорида портлади: у ерда картина 600 миллион доллардан ортиқ даромад йиғиб, Хитойдаги энг муваффақиятли голливуд кинолойиҳасига айланди. Ҳозирча унга рақобат қила оладиган ягона ном сифатида “Avatar: Аланга ва кул” тилга олинмоқда — бу фильм Хитойда 100 миллион доллардан зиёд йиғишга эришган.

Яна бир муҳим кўрсаткич: “Зверополис 2” PG рейтингидаги фильмлар орасида 1 миллиард долларлик чегара энг тез босиб ўтилган лойиҳа бўлди — бу натижага премьерадан кейинги атиги 17 кун ичида эришилган.

Шунингдек, “Зверополис 2” 2025 йилда жаҳон прокатида 1 миллиард доллардан ошган атиги уч фильм қаторига кирди. Бу рўйхатда “Лило ва Стич” ремейки (1,03 млрд) ҳамда йилнинг глобал етакчиси бўлиб турган хитой фильми “Нечжа” (2,2 млрд) ҳам бор.