Resident Evil Requiem 4 млн киши томонидан истаклар рўйхатига қўшилди

Resident Evil Requiem ёзда эълон қилинганидан бери 4 миллион ўйинчи томонидан истаклар рўйхатига киритилди. Бу ҳақда лойиҳа ишлаб чиқувчилари X ижтимоий тармоғида маълум қилди. Бу ҳақда kursiv.uz хабар беради.

Қизиқишнинг кескин ошишига The Game Awards 2025 маросимида намойиш этилган янги трейлер сабаб бўлгани айтилмоқда. Унда Capcom ўйинда иккинчи бош қаҳрамон ҳам борлигини расман тасдиқлади — у сериянинг энг таниқли персонажларидан бири Леон Кеннеди бўлади.

Ҳикоя Леон ва янги қаҳрамон — ФҚБ таҳлилчиси Грейс Эшкрофт ўртасида бўлинади. Грейс билан ўйнашда яширин ҳаракатланиш (стелсс) ва қўрқинчли унсурлар устун бўлса, Леон классик жанговар услубни сақлаб қолади ва душманлар билан фаол тўқнашувларга кўпроқ таянади.

Сюжетга кўра, сериянинг тўққизинчи рақамли қисми ўйинчиларни Resident Evil 2 якунида кўрсатилган бомбардимондан 30 йил ўтиб вайрон бўлган Раккун-Ситига қайтаради. Шаҳар талафот кўрганига қарамай, ҳануз хавф-хатар ва яширин сирлар манбаи бўлиб қолади.

Resident Evil Requiem’ни ҳам биринчи, ҳам учинчи шахс кўринишида ўйнаш мумкин бўлади. Ўйин 27 февраль куни PC (Steam), PlayStation 5, Xbox Series ва Nintendo Switch 2 платформаларида чиқиши режалаштирилган. Лойиҳа тўлиқ русча локаллашувни ҳам олади.