Трамп Венесуэла нефтига кириш эҳтимолини тилга олди

Душанба куни АҚШнинг йирик нефть компаниялари акциялари кўтарилди. Бунга президент Доналд Трампнинг Венесуэла нефть захираларига кириш имконияти юзага келиши мумкинлиги ҳақидаги баёнотлари фон бўлди, деб ёзади Reuters. Бу ҳақда kursiv.uz хабар беради.

Трампнинг айтишича, Венесуэла раҳбари қўлга олинганидан кейин АҚШ мамлакатдаги нефть объектлари устидан назорат ўрнатиши эҳтимоли бор. У америкалик компаниялар маблағ киритиб, инфратузилмани тиклаши ва кейинчалик бундан даромад олиши мумкинлигини таъкидлади.

Венесуэла дунёдаги энг йирик нефть захираларига эга. Бироқ сўнгги йилларда нотўғри бошқарув, инвестициялар танқислиги ва санкциялар оқибатида қазиб олиш кескин камайган.

Premarket савдоларида Венесуэлада фаолият юритаётган ягона йирик АҚШ компанияси — Chevron акциялари 7% га ошди. Phillips 66, Marathon Petroleum, Valero Energy ва PBF Energy қимматли қоғозлари эса 5–16% оралиғида юқорилади.

Шу билан бирга, умумий ҳисобда нефть нархлари деярли ўзгармади: жаҳон бозорида таклиф юқорилигича қолаётгани буни жиловламоқда. Венесуэладан етказиб бериш масаласида эса ноаниқлик сақланиб турибди.

Венесуэла нефти оғир ва олтингугурт миқдори юқори бўлгани сабабли дизел ҳамда бошқа оғир маҳсулотлар ишлаб чиқариш учун қулай ҳисобланади. Бундай хомашё АҚШнинг Мексика қўлтиғи ҳудудидаги, айнан шу турдаги нефтьни қайта ишлашга мослаштирилган заводларида нисбатан осон қайта ишланади.

Reuters қайд этишича, эҳтимолий сиёсий ва иқтисодий ўзгаришлар рўй берса, бундан биринчи бўлиб Chevron ютиши мумкин. АҚШ нефтьни қайта ишлаш корхоналари эса уйга яқин манбадан кўпроқ оғир нефть олиш имкониятига эга бўлади.