Самарқандда 29 ёшли эркакнинг қорнидан 200 грамм мих чиқди

Самарқандда тиббиёт амалиётида кам учрайдиган, лекин одамни ларзага соладиган ҳолат қайд этилди. 29 ёшли фуқаронинг қорин бўшлиғидан жами 200 граммга яқин мих ва “саморез”лар олиб ташланди. Бу ҳақда Республика шошилинч тиббий ёрдам илмий марказининг Самарқанд филиали маълум қилди.

Маълум қилинишича, А.Э. исмли 29 ёшли бемор муассасага қорин соҳасидаги кучли оғриқ билан олиб келинган. Шошилинч қабул бўлимида ўтказилган диагностика ҳамда лаборатория текширувлари натижасида унинг меъда-ичак тизимида катта миқдорда ёт жисмлар борлиги аниқланган. Дастлабки хулосаларга кўра, бу металл буюмлар инсон ҳаёти учун ўта хавфли ҳолатни юзага келтирган.

Шифокорлар беморни вақтида қутқариб қолиш мақсадида шошилинч жарроҳлик амалиётига киришган. Лапаротомия ва гастростомия усулида ўтказилган операция давомида қорин бўшлиғидан михлар, “саморез”лар ҳамда бошқа металл жисмлар чиқариб олинган.

Айни пайтда беморнинг аҳволи қониқарли экани айтилмоқда. У шифокорлар назорати остида даволанишда давом этмоқда.

Тиббиёт муассасаси маълумотларига кўра, эркак қаттиқ стресс ҳолатида бўлиб, ўз хатти-ҳаракатларини назорат қила олмагани сабаб ушбу буюмларни ютиб юборган бўлиши мумкин. Мутахассислар эса бундай ҳолатлар руҳий босим ва оғир психологик ҳолат оқибатида юзага келиши мумкинлигини эслатиб, стресс белгиларини енгил кўрмасликка чақирмоқда.