«Олтин глобус»: «Жанг ортидан жанг» тўртта совринни қўлга киритди...

Лос-Анжелесда бўлиб ўтган “Олтин глобус” мукофотининг 83-маросимида Пол Томас Андерсон суратга олган трагикомедия — “Жанг ортидан жанг” кечанинг энг йирик ғолибига айланди. Картина комедия ёки мюзикл йўналишида энг яхши фильм, энг яхши режиссура, энг яхши сценарий ва иккинчи пландаги энг яхши аёл роли каби тўртта номинацияда совринни олиб кетди. Иккинчи пландаги энг яхши актриса мукофоти Тийана Тейлорга топширилди. Бу ҳақда kursiv.uz хабар беради.

“Энг яхши драма” йўналишида эса Хлои Чжао ишлаган “Гамнет” фильми ғолиб бўлди. Бу — Мегги О’Фаррелл романига асосланган, Уильям Шекспирнинг ёшлик даврига бағишланган экран асари. Фильмнинг бош ижрочиси Жесси Бакли драматик фильмда энг яхши аёл роли учун “Олтин глобус”га сазовор бўлди.

Хорижий фильмлар орасида бразилиялик режиссёр Клебер Мендонса Фильо суратга олган “Махфий агент” триллери энг яхши деб топилди. Ушбу фильмда бош ролни ижро этган Вагнер Моура эса драма жанрида энг яхши актёр мукофотини қўлга киритди.

Комедия ёки мюзикл жанридаги энг яхши эркак роли бўйича Тимоти Шаламе илк бор фаолиятида “Олтин глобус”ни ютди — у “Марти Ажойиб” фильмидаги ижроси билан тақдирланди.

Сериаллар бўйича драматик мукофот “Питт шифохонаси” лойиҳасига насиб этди, унда роль ўйнаган Ноа Уайли энг яхши эркак роли учун ҳайкалчани олди. Энг яхши комедиявий сериал деб “Киностудия” тан олинди.

Роуз Бирн комедия ёки мюзикл йўналишида энг яхши актриса номинациясида ғолиб чиқди. Жин Смарт эса “Ҳийлалар” комедиявий сериалидаги бош роли учун алоҳида тақдирланди.

Мини-сериаллар орасида “Ўтиш ёши” энг яхшиси деб эътироф этилди. Иккинчи пландаги энг яхши эркак роли номинациясида 16 ёшли Оуэн Купер ғолиб чиқиб, ушбу йўналишда энг ёш совриндорга айланди. Мини-сериалдаги энг яхши актёрлик ишлари учун Стивен Грем ва Эрин Доерти ҳам мукофотларга эга бўлди.