Гвардиола Семенёнинг «Сити»даги дастлабки ўйинларини юқори баҳолади

«Манчестер Сити» бош мураббийи Хосеп Гвардиола янги трансфер, «Борнмут»дан 75 миллион евролик вингер Антуан Семенёнинг жамоадаги дастлабки ўйинларини таҳлил қилиб, унинг ўйинига юқори баҳо берди.

Гвардиола BBС нашрига берган интервьюсида шундай деди:
“Биз «Борнмут» Семенё билан қандай ажойиб иш олиб борганини кўрдик. Ҳозир унинг ўйинига қарасам, тўп ҳар гал унга келганда, у доимо тўғри жойда бўлиб, вазиятдан фойдаланишга тайёр туради”.

Ганалик футболчи “Манчестер Сити” сафида икки ўйинда майдонга тушди ва ҳар иккала учрашувда ҳам самарали ҳаракат қилди. Ундаги фаоллик, айниқса, Англия Кубоги доирасидаги “Эксетер”га қарши ўйинда намоён бўлди. У ушбу баҳсда гол уриб, яна бир голли узатмани амалга оширди.

Шунингдек, Англия Лига кубоги яримфиналидаги “Нюкасл”га қарши ўйинда Семенё ўйиннинг ҳал қилувчи голини уриб, жамоасининг 2:0 ҳисобидаги ғалабасига ҳисса қўшди.

Жорий мавсумда, 26 ёшли Семенё барча мусобақаларда 23 та ўйин ўтказиб, 12 та гол уриб, 4 та голли узатма берди. Унинг фаоллиги ва самарадорлиги жамоа учун жуда муҳим аҳамият касб этмоқда. Гвардиола ўзининг жамоасида бу янги аъзонинг қандай катта ҳисса қўшаётганини таъкидлади.