Наманганда алимент тўламаган отадан 42 млн ундирилди
Наманган вилоятида алимент тўловларини узоқ вақтдан бери бажармаган қарздор отадан катта миқдордаги қарз тўлиқ ундирилди. Мажбурий ижро бюроси Янги Наманган тумани бўлими давлат ижрочилари олиб борган тушунтириш ишлари натижасида 42 миллион сўм алимент қарзи қопланди.
Маълум бўлишича, Фуқаролик ишлари бўйича Наманган туманлараро судининг ҳал қилув қарорига асосан фуқаро М.М. фойдасига бир нафар фарзанд таъминоти учун алимент ундириш белгиланган. Аммо қарздор белгиланган мажбуриятни узоқ вақт давомида бажармагани сабабли, жами 42 миллион сўм қарздорлик йиғилиб қолган.
Давлат ижрочиси қарздорга қонунчилик талаблари, алимент тўламасликнинг оқибатлари ҳамда ҳуқуқий жавобгарлик масалаларини батафсил тушунтирган. Шундан сўнг қарздор ўз мажбуриятини англаб етиб, алимент бўйича қарздорликни тўлиқ тўлаб берган.
МИБ органлари вояга етмаганларнинг манфаатларини ҳимоя қилиш, алимент тўловларини ўз вақтида ва тўлиқ ундириш бўйича ишлар изчил давом эттирилаётганини маълум қилди.