Қозоғистонда сунъий интеллект имом ишга туширилади
Қозоғистонда диний-маърифий соҳада сунъий интеллект технологияларини жорий этиш режалаштирилмоқда. Қозоғистон Мусулмонлари диний бошқармаси сунъий интеллект асосида ишлайдиган “Имом AI” мобил иловасини ишлаб чиқишни режалаштираётганини маълум қилди. Бу ҳақда Orda.kz нашри хабар берди.
Қозоғистон Олий муфтийси Наурйзбай ҳожи Таганулининг сўзларига кўра, мазкур иловани ишга тушириш 2026 йилга мўлжалланган. “Имом AI” ишончли диний манбалар асосида фойдаланувчиларнинг саволларига тезкор ва аниқ жавоблар бериши кутилмоқда.
Баёнотда қайд этилишича, замонавий талабларни инобатга олган ҳолда диний соҳада ҳам сунъий интеллект имкониятларини тизимли жорий этиш зарур. Лойиҳа фуқароларнинг диний саволларига осон ва ишончли жавоб олишига хизмат қилиши, шу билан бирга имомлар ва руҳонийлар зиммасидаги юкни камайтириши ҳам кўзда тутилган.
Шунингдек, Қозоғистон Президенти Қосим-Жомарт Тоқаев 2026 йилни Рақамлаштириш ва сунъий интеллект инфратузилмасини ривожлантириш йили деб эълон қилган эди. Президент таъкидлаганидек, илғор технологияларни жорий этиш мамлакатнинг барча соҳалардаги салоҳиятини оширишга хизмат қилади.
Аввалроқ Ўзбекистон Мусулмонлар идораси сунъий интеллектдан диний саволларни сўраш жоиз эмаслигини маълум қилган эди.