Эроннинг Покистондаги элчиси Трамп Теҳронга ҳужум қилмасликни ваъда қилганини айтди
Эроннинг Покистондаги элчиси Резо Амири Моғаддам Исломободга ташрифи чоғида Теҳрон ва Вашингтон ўртасидаги тарангликка оид баёнот берди. Унинг айтишича, АҚШ президенти Доналд Трамп Эрон томонига уруш истамаслигини билдирган ва Теҳрондан ҳам вазминликни сақлашни сўраган. Бу ҳақда podrobno.uz хабар беради.
Дипломатнинг таъкидлашича, у мазкур хабарни тунда, соат 01:00 атрофида олган. Хабарда Трамп Эронни нишонга олиш нияти йўқлиги, бироқ Теҳрон ҳам минтақадаги Америка объектларига зарба бермаслиги кераклиги қайд этилган.
Элчининг сўзларига кўра, бу мурожаат АҚШнинг Эрон ичидаги намойишлар фонида ҳарбий аралашув эҳтимоли ҳақида янграган таҳдидлар ортидан янграган. У ички вазиятни изоҳлар экан, фуқароларнинг тинч норозилик билдириш ҳуқуқини тан олди ва ҳукумат намойишчилар билан мулоқот олиб бораётганини айтди.
Шу билан бирга, Моғаддам Ғарб оммавий ахборот воситалари зўравонликни қўзғатганини, бу эса мамлакат тарихидаги энг оғир воқеаларга олиб келганини даъво қилди. Унинг маълумотига кўра, қуролланган гуруҳлар масжидларга ҳужум қилган ва ёнғинлар уюштирган.
Теҳрон расмийлари вазият тўлиқ назорат остида эканини ва норозиликлар тўхтаганини билдирган. Бироқ Эрон юқори жанговор шайлик режимини сақлаб қолган, шунингдек ҳаво ҳудудини вақтинча ёпган. Элчи айтишича, агар Исроил ёки АҚШ томонидан тажовуз бўлса, Эрон минтақадаги уларнинг объектларига жавоб зарбалари беришга тайёр.
Моғаддам Покистонга ҳар томонлама кўмак учун алоҳида миннатдорлик билдирди. Унинг қайд этишича, 44 йилдан бери давом этаётган санкциялар босими шароитида Теҳрон учун моддий ёрдамдан кўра мусулмон давлатларининг маънавий ва сиёсий ҳамжиҳатлиги муҳимроқ.
Эслатиб ўтамиз, Эронда 28 декабрдан буён кенг кўламли норозиликлар давом этаётгани хабар қилинган: уларга миллий валютанинг кескин қадрсизланиши ва юқори инфляция туртки бўлган. Дастлаб Теҳрондаги Катта бозорда савдогарлар иш ташлаган, кейин намойишлар мамлакатнинг кўплаб ҳудудларига тарқалган.
Аввалроқ норозиликлар пайтида қарийб икки минг нафар намойишчи ва хавфсизлик ходимлари ҳалок бўлгани айтилган, бироқ Эрон ташқарисидаги мухолиф гуруҳлар қурбонлар сони анча кўп эканини таъкидлайди. Жаҳон ОАВлари ҳам турлича рақамларни келтирмоқда: Fox News умумий тарзда қурбонлар ортаётганини ёзса, The New York Times ахборот чекловлари сабаб аниқ ҳисоблаш қийинлигини айтиб, юзлабдан минглабгача бўлган оралиқни тилга олади. CBS News эса 12–20 минггача деган энг юқори кўрсаткичларни қайд этади, аммо бу маълумотлар тасдиқланмаган.