Ўзбекистон АҚШда учта янги консуллик очади
Ўзбекистон АҚШдаги дипломатик иштирокини кенгайтиришни ва ҳаво қатнови йўналишларини кўпайтиришни режалаштирмоқда. Мамлакатнинг амалдаги ваколатхоналарига қўшимча равишда учта янги консуллик иш бошлайди, парвозлар географияси эса Калифорния ҳамда Флорида томон кенгайиши мумкин. Бу ҳақда podrobno.uz хабар беради.
Бу ҳақда Ўзбекистоннинг АҚШдаги элчиси Фурқат Сидиқов 17 январ куни тадбиркорлар билан учрашувда маълум қилди. Унинг айтишича, ўнлаб йиллар давомида Ўзбекистон манфаатларини АҚШда асосан Вашингтондаги элчихона ва Ню-Йоркдаги бош консуллик ифодалаб келган.
Эндиликда янги консулликлар Чикаго, Сан-Франсиско ҳамда Вашингтон штатида очилиши кўзда тутилган. Дипломатик тармоқни кенгайтириш режалари АҚШ фуқаролари учун 2026 йилдан Ўзбекистонда визасиз тартиб жорий этилиши фонида эълон қилинди.
Элчи Ўзбекистон минтақада Америка билан тўғридан-тўғри авиаалоқага эга ягона авиация хаби бўлиб қолаётганини таъкидлади. Ҳозир Ню-Йорк йўналишида ҳафтасига 5 та рейс амалга оширилмоқда, келгусида эса АҚШнинг ғарбий қирғоғи ёки жанубига — Калифорния ёхуд Флорида томон тўғридан-тўғри парвозлар йўлга қўйилиши муҳокама қилинмоқда.
Сидиқов АҚШ бозорида мамлакатни тарғиб қилишдаги ҳозирги ёндашувларни танқид қилиб, кўплаб материалларни “шаблон” деб баҳолади. У туроператорларга аудиториянинг аниқ эҳтиёжларига мослашган маҳсулот ва таклифларни ишлаб чиқишни тавсия қилди.
Янги тарғибот стратегияси доирасида Ўзбекистон National Geographic телеканали билан ҳамкорликни бошлади. Жорий йилда телеканал ижодий гуруҳи республикага келиб, ҳужжатли сериал суратга олиши режалаштирилган — лойиҳа Ўзбекистоннинг туристик брендини халқаро томошабинга таништиришга қаратилaди.
Элчи якунда маблағларни расмий тадбирларга эмас, кучли маркетингга, шунингдек, нуфузли глобал блогерларни жалб этишга йўналтириш зарурлигини қайд этди.
Шунингдек, Ўзбекистон АҚШ билан ўз фуқаролари учун виза олиш тартибини соддалаштириш бўйича музокаралар олиб бораётгани билдирилди. Элчи жараён узоқ давом этишини ва кўп жиҳатдан АҚШ томони қарорларига боғлиқлигини айтди.