Содиқ Сафоев: Тошкент пропискаси инсон ҳуқуқларига зид эди

Ўзбекистон Сенати раисининг биринчи ўринбосари Содиқ Сафоев аввал амалда бўлган Тошкент прописка тизимини кескин танқид қилди. У мазкур тартибни инсон ҳуқуқларини камситувчи ва адолат тамойилларига зид тизим сифатида баҳолади.

Сафоевнинг таъкидлашича, Ўзбекистон фуқароси бўла туриб, одамлар пойтахтда ўз хоҳишига кўра яшай олмаган. Прописканинг йўқлиги ишга жойлашиш, рўйхатдан ўтиш ва кундалик ҳаётни ташкил этишда жиддий муаммолар келтириб чиқарган. Бу эса жамиятда тенгсизлик ва ижтимоий адолатсизликни кучайтирган.

У давлат раҳбарининг инсон ҳуқуқларини устувор қўйган сиёсати натижасида ушбу “шармандали тизим” бекор қилинганини алоҳида қайд этди. Бу қарор фуқароларнинг эркин ҳаракатланиш, яшаш жойини танлаш ва меҳнат қилиш ҳуқуқларини таъминлашда муҳим қадам бўлган.

Сафоевнинг фикрича, прописка тизимининг тугатилиши Ўзбекистонда очиқлик ва адолатга асосланган янги босқични бошлаб берди. Эндиликда фуқаролар мамлакатнинг исталган ҳудудида, жумладан Тошкентда ҳам, қонуний ва эркин яшаш имконига эга.