Финляндияда эркак мушугининг вафоти учун “болничний” олган

Финляндияда бир эркак уй мушуги вафот этганидан кейин вақтинча меҳнатга лаёқатсизлик варақаси олгани билан боғлиқ ҳолат жамоатчилик эътиборини тортди. Хабарларга кўра, иш берувчи мушукнинг ўлимига боғлиқ руҳий ҳолатни “узрли сабаб” сифатида тан олмагани оқибатида масала судгача борган.

Маълум қилинишича, мушук оғир хасталикка чалинган ва уни эвтаназия қилишга тўғри келган. Эгаси иш жойига касаллик варақасини топширган, ҳатто тиббий маълумотнома ҳам тақдим этган. Бироқ корхона раҳбарияти ҳужжатларни қабул қилмаган ва унга “ё ишга чиқ, ё ариза ёз” деган талаб қўйган.

Эркак босим сабаб ишга қайтган, аммо кейинчалик “узрли сабабсиз ишга келмаган” деган важ билан ишдан бўшатилган. Шундан сўнг у Тампере шаҳридаги туман судига мурожаат қилган ва суд даъвогар тарафини олган.

Натижада корхона собиқ ходимига 40 минг евродан ортиқ маблағ тўлашга мажбур этилган. Ушбу сумма компенсация, касаллик даври учун тўлов ҳамда суд харажатларини қамраб олган. Бироқ эркакнинг ўзи бу пулдан фойдалана олмаган — у суд қарори эълон қилинишигача вафот этган. Шунга кўра, суд маблағни мерос таркибига киритиш ҳақида қарор чиқарган.