Илон Маск сунъий интеллект қачон инсон ақлидан устун бўлишини айтди
Илон Маскнинг таъкидлашича, сунъий интеллект 2026 йил охиригача ҳар қандай алоҳида инсоннинг имкониятларидан ўзиб кетиши, 2031 йилга бориб эса бутун инсониятнинг умумий интеллектидан ҳам устун бўлиши мумкин. Бу ҳақда podrobno.uz хабар беради.
У бу прогнозларни Давосдаги Жаҳон иқтисодий форумидаги чиқиши чоғида билдириб, AI ривожи кутилганидан ҳам тезлашгани ва инсоният технологик сингуларликка яқинлашиб бораётганини қайд этди.
Маск назарида, асосий муаммо технологияларда эмас, балки электр энергияси танқислигида. Нейрон тармоқлар учун чиплар ишлаб чиқариш ошаётган бўлса-да, кўплаб давлатларнинг энергия инфратузилмаси бундай юкламани кўтаришга улгурмаяпти.
Муқобил ечим сифатида у ҳисоблаш қувватининг бир қисмини космосга кўчириш ғоясини илгари сурди. SpaceX қуёш энергиясида ишлайдиган ва вакуумда совиши мумкин бўлган, ичига сунъий интеллект тизимлари ўрнатилган сунъий йўлдошларни учиришни режалаштирмоқда.
Шунингдек, Маск хавфларга қарамай, сунъий интеллект кенг кўламли фойда келтириши мумкинлигини айтди. Унинг фикрича, тўғри назорат остида AI ва Tesla Optimus каби гуманоид роботлар товар ва хизматлар ҳамма учун янада арзон ва қулай бўладиган даврни яқинлаштиради.