«Фенербаҳче» собиқ футболчиси Моуринё ваъдасида турмади, деди
«Фенербаҳче»нинг собиқ футболчиси Линколн португалиялик мураббий Жозе Моуринё ҳақида кескин фикр билдирди. Моуринё Истанбул клубини 2024–2025 йилларда бошқарган. Бу ҳақда euro-football.ru хабар беради.
Линколннинг айтишича, мураббий унга берган ваъдасини бажармаган ва футболчига нисбатан ҳурматсизлик қилган. У ижарага «Халл Сити»га кетиши олдидан Моуринё билан гаплашганини, мураббий эса уни Португалиядаги ёзги йиғинга кутаётганини айтганини таъкидлади.
Футболчи мавсумни Англияда якунлагач, йиғинга чақирув бўлишини кутган, бироқ кейин Моуринё билан боғланишга уринганида, мураббий мулоқотдан бош тортган. Линколннинг сўзларига кўра, Моуринё у билан бевосита гаплашмай, спорт директорига мурожаат қилишни айтган.
Линколн ўша пайтда жамоа Португалияда бўлганига қарамай, уни Истанбулга юборишганини ва алоҳида машғулот ўташ буюрилганини қўшимча қилди. У бу ҳолатни адолатсиз ва ҳурматсиз муносабат сифатида баҳолади, шунингдек, жароҳатидан сўнг клуб томонидан етарли қўллаб-қувватлаш бўлмаганини ҳам айтди. «Машҳур футболчи бўлмасам ҳам, доим майдонда боримни берганман», — деди у Fanatik нашрига.
Ҳозирда Жозе Моуринё «Бенфика»ни бошқармоқда.