«Реал» Мбаппе ҳақида машғулотлар бўйича янгилик берди
Мадриднинг «Реал» жамоаси Европа Чемпионлар лигасида «Бенфика»га қарши сафардаги учрашувга тайёргарликни давом эттирмоқда. Душанба куни Альваро Арбелоа бошчилигидаги жамоа навбатдаги машғулотни ўтказди ва клуб айрим футболчиларнинг ҳолати юзасидан маълумот берди. Бу ҳақда euro-football.ru хабар беради.
Клуб хабарига кўра, Килиан Мбаппе индивидуал дастур асосида енгил юклама билан шуғулланди. Антонио Рюдигер эса машғулотнинг бир қисмини умумий гуруҳ билан ўтказиб, кейин алоҳида ишлаган. Шунингдек, Каррерас ҳам Мбаппе каби индивидуал тарзда мўътадил машғулот ўтказгани қайд этилди.
Маълумотда Эдер Милитао залда шуғуллангани, Ферлан Менди эса майдонда ҳам, бино ичида ҳам индивидуал машғулот олиб боргани айтилган.
«Бенфика» — «Реал» учрашуви 29 январ куни 01:00 да (Тошкент вақти билан) бошланади. Лиссабондаги ўйин жараёнини LiveResult портали матнли трансляция орқали ёритиб боради.