Клозе Месси ва Мбаппе унинг ЖЧ рекордини янгилашини кутмоқда
Германия терма жамоасининг собиқ ҳужумчиси Мирослав Клозе жаҳон чемпионатларидаги голлар бўйича ўрнатган рекорди яқин йилларда барибир янгиланишига ишонмоқда. Бу ҳақда euro-football.ru хабар беради.
Клозе тўртта мундиалда майдонга тушиб, жами 16 бор рақиб дарвозасини ишғол қилган. Ҳозир фаол футболчилар орасида унга энг яқин натижа Лионел Мессида (13 гол) ва Килиан Мбаппеда (12 гол).
Bild нашрига кўра, Клозе рекордини 2026 йилда Месси янгилаши мумкинлигини, Мбаппе эса 2026 ёки 2030 йиллардаги турнирларда бунга яқин келишини айтган. У Мессининг катта мухлиси эканини таъкидлаб, аргентиналик футболчига фаолиятини давом эттирса омад тилаган. Клозе Мбаппенинг ҳам салоҳиятини алоҳида эътироф этиб, ҳар икки юлдуз соғлом бўлиб, энг юқори даражасини кўрсатишини исташини билдирган. Шунга қарамай, у ҳозирча энг яхши статистика ўзида эканини ва тўрт марта ярим финалда ўйнаган ягона футболчи бўлиб қолаётганини эслатган.
Эслатиб ўтамиз, Месси Қатар-2022 мундиалида чемпион бўлган, Мбаппе Россия-2018да кубокни қўлга киритган. Клозе эса Бразилия-2014 жаҳон чемпионатида Германия билан ғолибликни нишонлаган.