Ҳусанов “Галатасарой” билан ўйинда Осимхенни ўчирди: мухлислар олқиши
Европа Чемпионлар лигаси умумий босқичидаги сўнгги учрашувда “Манчестер Сити” ўз уйи — “Этихад”да Туркия чемпиони “Галатасарой”ни қабул қилди ва 2:0 ҳисобида ишончли ғалаба қайд этди. Бу натижа “шаҳарликлар”га мусобақанинг 1/8 финалига тўғридан тўғри йўлланма берди — энди Пеп жамоаси қўшимча ўтиш ўйинларига кириб ўтирмайди.
Бироқ бу кечанинг асосий сюжети фақат ҳисобда эмас эди. Мухлису мутахассисларнинг кўзи кўпроқ майдон марказидаги битта ўта қизиқ тўқнашувга қадалди: Туркия Суперлигасининг энг хавфли ҳужумчиси, тажрибали юлдуз Виктор Осимхен ва “Сити”нинг ёш марказий ҳимоячиси Абдуқодир Ҳусанов ўртасидаги дуэль.
21 ёшли ўзбек футболчиси бу баҳсда ҳақиқий “бетон девор”дай кўринди. Ҳусанов ҳимоя марказини жуда пухта назорат қилди, позицияни йўқотмади, керакли пайтда тўпни олиб қўйди, керак бўлганда эса хавфли ҳужум йўналишини бир ҳаракатда “кесиб” ташлади. Энг муҳими — Осимхенга гол уриш учун деярли ҳеч қандай қулай вазият қолдирмади. Катта ном, катта тажриба — бари бор, лекин майдондаги манзара бошқача бўлди: Ҳусанов унинг “нафас олиш” жойини ҳам тор қилиб қўйди.
Шунинг учун ҳам “Манчестер Сити”нинг бутун дунёга сочилган мухлислари ижтимоий тармоқларда айнан шу эпизодларни муҳокама қилди. Осимхенга қарши ўйин — ҳимоячи учун энг қаттиқ имтиҳонлардан бири. Ҳусанов эса бу имтиҳондан “Аъло” билан ўтди, десак муболаға бўлмайди.
Мухлислар эътирофи ҳам шунга мос бўлди. Кимдир “Ҳусановдан Rolls-Royce даражасидаги ўйин!” деб ёзди, яна кимдир “Осимхенга ‘нон’ бермади” деб ҳазиллашди. Айримлар эса жуда жиддий хулоса қилди: “Пеп Ҳусановни мунтазам ўйнатса, у дунёдаги энг зўр ҳимоячига айланади”. Бошқалар “Ҳусанов эраси бошланди” деб ҳам қўшиб қўйди.
"Сити" мухлисларининг Ҳусановни олқишловчи сўзларини уларнинг қуйидаги постлари орқали ҳам ўқишингиз мумкин:
Jacob Garba:
Абдуқодир жуда кучли экан...
Ackim Musole:
Ҳусанов, сенга ҳурматим баланд, илтимос шу руҳда давом эт.
Ali Toochukwu:
Бизга Осимхен Холанддан яхшироқ дейишган эди.
Barnabas Nandwa:
Ҳусанов, Гехи, Йошко ва Нуньеш кейинги мавсумда энг зўр ҳимоя чизиғи бўлади. Ишонинг.
Micheal Pacho:
Осимхен бу Ҳусанов деган йигитни ҳеч қачон унутмайди.
Vini Jnr:
Ҳусанов — ҳақиқий қаҳрамон.
Topwayne Clement:
Ҳусанов – жаҳон даражасидаги ўйинчи.
Vic Tor:
Аке энди Ҳусановни ҳам ҳурмат қил.
MIso Ndodana Ka MaMthembu:
Абдуқодир дунёдаги энг зўр марказий ҳимоячи.
Rollins Riches:
Ҳусанов ва Доннарумма Виктор Осимхенни тўхтатишди.
Sudeys Sheikh:
Бу ёғига энди Ҳусанов ёндиради...
Martinelli Mkabontezz Raj:
Ҳусанов — энг яхши ҳимоячи.
Mulalo Cairo Netshisumbewa:
Ҳусанов ҳар доим ўйнаши керак. Мен уни биринчи ўринга қўяман.
Тез-тез учрайдиган “ҳайп” гаплар ҳам бор, албатта. Лекин шу кечадаги ўйиндан кейин битта нарса аниқ: Абдуқодир Ҳусанов катта босимдан қўрқмайди. У катта саҳнада ўзини йўқотмайдиган футболчи эканини кўрсатди. Осимхен билан бўлган дуэль эса унинг карьерасидаги навбатдаги “трамплин” бўлиши мумкин.
Энди “Сити” 1/8 финалда. Аммо мухлислар учун яна бир қизиқ савол туғилди: агар Ҳусанов шундай руҳда давом этса, Пеп уни доимий асосий таркибга айлантирадими? Чунки бу ўйиндан кейин бир нарса сезилди — “шаҳарликлар” ҳимоясида янги ишонч нуқтаси пайдо бўлди.