YouTube сунъий интеллект слопига қарши қатъий тозалаш бошлади
YouTube платформасида сунъий интеллект ёрдамида ясалган паст сифатли, мазмунсиз ва такрорий видеоларга қарши кураш янги босқичга чиқди. The Verge хабар беришича, видеохостинг айнан шундай “СИ-слоп” контент тарқатган йирик каналларни ўчира бошлади.
Kapwing монтаж хизмати келтирган ҳисоботга кўра, YouTube 5,9 миллион обуначига эга CuentosFacianantes каналини платформадан олиб ташлаган. Ушбу канал видеоларининг умумий кўрилишлари 1,2 миллиардгача етгани қайд этилган. Шу билан бирга, 5,8 миллиондан зиёд аудитория тўплаган Imperio de Jesus канали ҳам энди YouTube’да кўринмайди.
Қайд этилишича, бу “тозалаш” жараёни YouTube бош директори Нил Моҳан сифатсиз СИ-контент кескин кўпайиб кетганидан хавотир билдирганидан кейин янада фаоллашган. У фойдаланувчиларга йўллаган мурожаатида платформа СИ-слоп тарқалишини камайтириш, шунингдек, спам ва кликбейтга қарши кураш тизимларини кучайтиришга ваъда берган.
Мутахассислар фикрича, “СИ-слоп” деганда кўпинча бир хил сценарий, сунъий овоз, тасодифий кадрлар ва тез-тез такрорланадиган “сенсация” услубидаги роликлар тушунилади. Бундай контент тез кўпайиб, тавсиялар лентасини тўлдириб қўяди ва натижада ҳақиқий меҳнат қилинган видеоларнинг кўрилиш олиши қийинлашади.
Шу боис YouTube’нинг кескин чоралари оддий томошабин учун “лентам тозаланади” деган умидни кучайтирса, контент яратувчилар учун эса битта аниқ сигнал: сунъий интеллектдан фойдаланиш мумкин, лекин мазмун, сифат ва ҳалол формат биринчи ўринда. Ҳозир эса платформадаги асосий тренд битта — ким сифатни ушлай олмаса, алгоритм ҳам, қоидалар ҳам кечирмайди.