Роналду майдондан эмас, балки тизимдан норози экани айтилди...
Саудия Арабистонидаги навбатдаги баҳсдан кейин “Ан-Наср” мухлислари битта саволни қайта-қайта беряпти: нега Криштиану Роналду ўйнамагани у ёқда турсин, ҳатто захирада ҳам кўринмади?
Бу ҳолатга машҳур инсайдер журналист Фабрицио Романо ойдинлик киритди. Унинг таъкидлашича, Роналдунинг қайдномадан тушиб қолиши одатдаги сабаблар билан боғлиқ эмас.
Энг муҳими, гап жароҳатда эмас. Ҳеч қандай оғриқ, тикланиш жараёни ёки шифокорлар тақиқлаган ҳолат йўқ. Шунингдек, бу қарор “дам бериш”, ўйин дақиқаларини тежаш ёки жисмоний тайёргарликни сақлаш учун қилинган “режали” ҳаракат ҳам эмас.
Романо ёзганига кўра, масаланинг тагида бошқа нарса ётибди. Роналду Саудия Профессионал лигасидаги айрим бошқарув механизмларидан, хусусан, Давлат инвестиция жамғармаси (PIF) ва муайян клубларнинг трансфер сиёсати, бюджет ҳамда имкониятларни тақсимлаш услубидан норози. Қисқаси, у вазиятдан қониқмаяпти ва бу норозилик майдондаги натижа ёки форма билан эмас, тизимдаги қарорлар билан боғлиқ.
Португалия ОАВларида тарқалган гап-сўзларга ҳам шу нуқтада изоҳ бор: Роналдунинг рўйхатдан чиқиб қолиши спорт жиҳатидан эмас, принципиал позиция нуқтасидан қаралаяпти.
Бунга қўшимча равишда, вазиятни янада “қиздирган” бир омил ҳам бор. Романо қайд этишича, “Ал-Иттиҳод” ва “Ал-Ҳилол” клубларининг Карим Бензема билан бевосита музокара олиб бораётгани фонида Роналдунинг норозилиги янада кучайган. Яъни трансфер бозоридаги катта ҳаракатлар, маблағ ва имкониятлар қай тарзда ишга солинаётгани уни қониқтираётгани йўқ.
Айни дамда Бенземанинг “Ал-Ҳилол”га ўтиши эҳтимол сифатида қаралаяпти, лекин келишув ҳали расман ёпилмаган. Музокаралар давом этяпти ва яқин соатларда картинани тўлиқроқ тушуниш мумкин бўлиши кутилмоқда.
Хулоса битта: Роналдунинг ўйиндан ташқари қолиши “форма йўқ” дегани эмас. Бу кўпроқ “менга майдонда шарт-шароитни тенг қилинг” деган сигналга ўхшаяпти. Энди эса барча диққат — клуб ва лига атрофидаги кейинги қарорларда: бу норозилик тезда юмшайдими ёки каттароқ бўронга айланадими. Мухлислар учун энг қизиғи ҳам шу.