Эрдўған аралашди, Канте "Фенербаҳче"га келишини тезлатди деганлар бор

Фото: onedio.com

Туркия футболи атрофида яна бир қизиқ шов-шув кўтарилди: хабарларга кўра, Туркия президенти Ражаб Тоййиб Эрдўған Н’Голо Кантеининг Истанбулнинг «Фенербаҳче» клубига ўтишида муҳим рол ўйнаган.

Истанбул клуби матбуот хизмати «Фенербаҳче» президенти Садеттин Сараннинг сўзларини келтириб, трансфер масаласидаги қўллаб-қувватлов учун давлат раҳбарига миннатдорчилик билдирганини маълум қилди. Саран таъкидлашича, бу келишув фақат клуб учун эмас, умуман Туркия футболи учун ҳам манфаатли бўлиши мумкин.

Эслатиб ўтамиз, сўнгги бир-икки йил давомида франциялик тажрибали ярим ҳимоячи Саудия Арабистонида «Ал-Иттиҳод» сафида тўп сурди. Ундан олдин эса Англияда «Лестер» ва «Челси»да ўйнаган, жаҳон чемпиони бўлган ва икки карра Англия чемпиони унвонини ҳам қўлга киритган. Ҳозирда Канте 34 ёшда.

Айни пайтда «Фенербаҳче» Туркия чемпионатида 46 очко билан иккинчи ўринда бормоқда. Пешқадам «Галатасарой»дан ортда қолиш — уч очко. Шу боис, мухлислар бу трансфер амалга ошса, чемпионлик пойгасидаги кураш янада қизишини кутяпти: тажриба, характер ва меҳнаткашлик деганда Канте номи кўпчиликнинг хаёлига биринчи бўлиб келади.