Пирс Морган Роналдунинг «Ал-Наср»даги позициясини тўлиқ қўллади

Машҳур журналист Пирс Морган Криштиану Роналдунинг «Ал-Наср»даги мураккаб вазияти юзасидан фикр билдирди. Яқинда 41 ёшни қарши олган португалиялик юлдуз клуб бошқарувидан норози экани, ҳатто жамоа ўйинларини бойкот қилаётгани ҳақида хабарлар тарқалди. Бу ҳақда euro-football.ru хабар беради.

Манбаларга кўра, агар яқин ойлар ичида вазият ўзгармаса, ҳужумчи ёзда Саудия Арабистонини тарк этиши мумкин. Морган эса футболчи билан алоқада бўлганини, бироқ суҳбат тафсилотларини ошкор этмаслигини айтди.

“Ҳа, Роналду билан гаплашганман, лекин бу суҳбат икковимиз орамизда қолади. Шуни айтишим мумкин: бу масалада Криштианунинг позициясини жуда яхши тушунаман ва уни 100 фоиз қўллаб-қувватлайман”, — дея Морганнинг сўзларини Al Nassr Zone келтирди.

Эслатиб ўтамиз, Роналдунинг «Ал-Наср» билан шартномаси 2027 йил ўрталаригача мўлжалланган. У Саудия Арабистонида уч йилдан ортиқ вақт давомида тўп суриб келмоқда.