Компани «Бавария»нинг ғалабасини юқори баҳолади ва идеал ҳисобни айтди
Бундеслиганинг 21-тур марказий ўйинида «Бавария» ўз майдонида «Хоффенхайм»ни 5:1 ҳисобида йирик мағлубиятга учратди. Учрашувдан сўнг мюнхенликлар бош мураббийи Венсан Компани натижа юзасидан фикр билдирди. Бу ҳақда euro-football.ru хабар беради.
Белгиялик мутахассиснинг айтишича, ҳисоб янада каттароқ бўлиши ҳам мумкин эди. «5:0 ёки 6:0 кўринишидаги натижа идеал бўларди. Лекин биз рақибга ҳурмат билан қараймиз: қаршимизда кучли жамоа бўлди, шунинг учун бу ҳисобни яхши дейиш мумкин. Энди бутун эътиборимиз «РБ Лейпциг»га қарши баҳсда», — дея Компани сўзларини клуб матбуот хизмати келтирди.
Ушбу ғалабадан кейин «Бавария» 54 очко жамғариб, Бундеслигада пешқадамликни сақлаб қолди. Мюнхен клуби энг яқин таъқибчисидан олти очкога олдинда бормоқда.