«Бока Хуниорс» спорт директори лавозимига Марсело Делгадони тайинлади
Аргентина гранди «Бока Хуниорс» клубида спорт директори лавозимига янги ном тайинланди — бу вазифани эндиликда Марсело Делгадо бажаради. Клуб раҳбарияти унинг ишини президент Хуан Рикелме билан яқин ҳамкорликда олиб боришини маълум қилди. Бу ҳақда euro-football.ru хабар беради.
Манбага кўра, «Бока Хуниорс» таркибни тезроқ кучайтиришга муҳтож. Шу сабаб Делгадо ва Рикелме тандемининг трансферлар ҳамда жамоани мустаҳкамлаш масалаларида фаол ишлаши кутилмоқда.
Делгадо футболчилик фаолиятида ҳам катта тажрибага эга: у Аргентина терма жамоаси сафида 1995–2002 йилларда 18 та учрашув ўтказган ва 1998 йилги жаҳон чемпионатида ҳам майдонга тушган.
Шунингдек, у 2003 йилда Либертадорес кубогида энг яхши тўпурар бўлган — бу натижани «Сантос» ҳужумчиси Рикардо Оливейра билан бирга қайд этган.