«Бавария» ёзги трансферларда хавфсиз ва истиқболли йўлни танлади
Мюнхеннинг «Бавария» клуби ёзги трансферлар бўйича йўналишини белгилаб олди. The Touchline хабарига кўра, немис гранди бу сафар таваккал даражаси паст, аммо қайтими юқори бўлиши мумкин бўлган футболчиларга устуворлик беришни танлаган. Бу ҳақда euro-football.ru хабар беради.
Режага кўра, «Бавария» бир нечта ёш ижрочиларни таркибга қўшмоқчи: улар ёки дарҳол асосий жамоада ўйнашга тайёр бўлади, ёки кейинчалик сотув орқали клубга фойда келтириши мумкин.
Шу маънода, «Бавария» бу йили катта юлдузлар ортидан қувишни режалаштирмаётгандек. Бундай сиёсат ўзини оқлайдими — буни вақт кўрсатади.
Ҳозирча мюнхенликлар Бундеслигада пешқадам бўлиб турибди ва аста-секин Чемпионлар лигаси 1/8 финалининг март ойидаги баҳсларига тайёргарлик кўрмоқда. Рақиб эса қиш якунига бориб аниқ бўлади.