Риберининг адвокати унга қўйилган айбловларни инкор этди
Сўнгги кунларда оммага ошкор қилинган “Эпштейн файллари” бутун дунёда катта шов-шувга сабаб бўлди. Мазкур ҳужжатлар футбол оламига ҳам тегиб ўтди — унда Франция терма жамоаси ва “Бавария”нинг собиқ футболчиси Франк Рибери номи тилга олинган. Бу ҳақда euro-football.ru хабар беради.
Вазиятдан сўнг Риберининг манфаатларини ҳимоя қилувчи адвокат Карло Альберто Бруза ижтимоий тармоқларда баёнот берди. У тарқалган маълумотларни ёлғон, дея атади.
“Бу фейк! Эртага мен жаноб Риберининг адвокати сифатида чиқаман ва мижозим ҳамда унинг оиласи шаънига путур етказаётган ёлғон хабарларни тарқатаётганларни жазолаш учун зарур барча ҳуқуқий чораларни кўраман”, — деб ёзди Бруза.
Қайд этилишича, Риберининг исми эълон қилинган файлларнинг уч саҳифасида учрайди. Тахмин қилинаётган жабрланувчи уни ноқонуний фоҳишалик билан боғлиқ алоқаларда айблаган, шунингдек, Риберининг илтимосига кўра учинчи шахс томонидан бир кишига ҳужум қилинганини ҳам маълум қилган.