«Ноттингем Форест» мавсумда учинчи бор мураббийни ишдан олди
«Ноттингем Форест» эгаси Эвангелос Маринакис сабр қилишни хуш кўрмайдиганга ўхшайди: 2025/2026 йилги мавсум давомида клуб аллақачон учинчи мураббийни истеъфога чиқарди. Бу ҳақда euro-football.ru хабар беради.
Аввалроқ Шон Дайч билан ҳам хайрлашилгани ҳақида хабар бергандик. Мутахассис 21 октябрдан буён жамоани бошқарган ва 25 ўйинда 10 ғалаба, 5 дуранг ҳамда 10 мағлубият қайд этган.
Октябрда эса «ўрмончилар» атиги саккиз учрашувдан (2 дуранг, 6 мағлубият) сўнг Анже Постекоглу билан йўлларини ажратган. Сентябрда эса Нуну Эшпириту Санту мураббийлик лавозимини тарк этган — бунга Маринакис билан муносабатлар совуқлашгани ва португалиялик мутахассис таркибни кучайтиришни талаб қилгани сабаб бўлган.
Ҳозир «Ноттингем Форест» АПЛ жадвалида 17-ўринда бормоқда ва қуйи лигага тушиш ҳудудидан бор-йўғи уч очко олдинда.