Филиппинда фудблогер заҳарли қисқичбақа еб вафот этди

Филиппинда ижтимоий тармоқ учун “контент” қилиш истаги оғир фожиа билан якунланди. 51 ёшли фудблогер Эмма Амит заҳарли “шайтон қисқичбақа”ни истеъмол қилиб, икки кун ичида вафот этди. Ҳодиса ҳақида “New York Post” хабар бермоқда.

Маълумотларга кўра, блогер дўстлари билан Палаван оролидаги Пуэрто Принсеса шаҳри яқинида денгиз маҳсулотлари ва турли жонзотларни йиғган. Кейин у видео учун турли таъмларни татиб кўрган: қисқичбақа, кокос сутида пиширилган денгиз шиллиққурти ва яна бошқа денгиз жонзотлари кадрларга туширилган.

Бироқ эртаси куни аёл ўзини кескин ёмон ҳис қила бошлаган. Заҳарли токсинлар таъсири кучайиб, клиникага олиб кетилаётган пайтда тутқаноқ белгилари кузатилган. Аҳволи оғирлашгач, у шифохонага ётқизилган. Ҳушсиз ҳолатда бўлганида лаблари кўкимтир тусга киргани ҳам қайд этилган.

Шифокорлар уни сақлаб қолиш учун барча имкониятларни ишга солган, аммо натижа бермаган. Аёл заҳарли қисқичбақани истеъмол қилганидан икки кун ўтиб вафот этган.

Ҳодисадан сўнг маҳаллий Лузвиминда қишлоғи раҳбари Ладди Геманг текширув учун масъулларни марҳуманинг уйига юборган. У ерда чиқиндилар орасидан ёрқин рангли “шайтон қисқичбақа”нинг пўстлоқлари топилган.

Мутахассислар таъкидлашича, Ҳинд-Тинч океани ҳудудида учрайдиган бу тур таркибида кучли нейротоксинлар — сакситоксин ва тетродотоксин бўлиши мумкин. Бу заҳарлар фугу балиқларида ҳам учрайди ва айрим ҳолатларда бир неча соат ичидаёқ ўлимга олиб келиши эҳтимоли бор.

Маҳаллий расмийлар эса аҳолини яна бир бор огоҳлантирмоқда: номаълум ёки заҳарли денгиз жонзотларини истеъмол қилиш ҳаёт учун ўта хавфли. Айниқса “кўрамиз-чи” деган тажриба ва “контент” ортидан қувиш, баъзан қайтиб келмайдиган йўлга айланиб қолиши мумкин.