Наумов Моуриню учун Саудия чемпионатини таклиф қилди
«Локомотив»нинг собиқ президенти Николай Наумов «Бенфика» бош мураббийи Жозе Моуриню фаолиятини давом эттириши мумкин бўлган энг мос манзил ҳақида фикр билдирди. У бу борадаги мулоҳазаларини «Евро-Футбол.Ru» нашрига берган интервьюсида айтди. Бу ҳақда euro-football.ru хабар беради.
Наумовнинг таъкидлашича, Моуринюнинг энг шов-шувли ва кутилмаган ғоялари билан ажралиб турадиган даври ортда қолган. Эксперт фикрича, португалиялик мутахассис ҳозир футбол ривожидан бироз ортда қолган ва аввалги ўзига хослигини йўқотиб, оддийроқ мураббий кўринишига кирган.
Шу сабаб Наумов Моуриню учун Саудия Арабистони чемпионати айни муддао бўлишини айтди: у ерда маошлар юқори, жанжал ва шов-шувлар қадрланади, шунингдек, ёши катта юлдуз футболчилар билан ишлаш имконияти ҳам бор. Наумовнинг фикрича, айнан шу лига Моуринюга мос келади.
Моуриню бошқарувидаги «Бенфика» Чемпионлар лигаси 1/16 финалида Мадриднинг «Реал» клубига қарши майдонга тушади. Дастлабки учрашув 17 февраль куни Португалияда бўлиб ўтади.