Агуэро қайси жамоани кўпроқ қўллашини очиқ айтди
Аргентина футболи юлдузи, собиқ ҳужумчи Серхио Агуэро Мадриднинг «Атлетико»си ва «Барселона» ҳақидаги муносабатини маълум қилди. Бу ҳақда euro-football.ru хабар беради.
Агуэро 2006–2011 йилларда «Атлетико» сафида тўп сурган, фаолиятининг якуний босқичида эса 2021 йил июлидан декабргача «Барселона» рангларини ҳимоя қилган.
«Мен ҳам «Атлетико»да, ҳам «Барселона»да ўйнаганман. Ростини айтсам, мен «Барса»ни чин дилдан севиб қолдим ва ҳозир уни «Атлетико»дан ҳам кўпроқ қўллаб-қувватлайман», — дея Агуэронинг сўзларини испан ОАВ келтирди.
Собиқ форвард фаолиятининг энг катта қисмини «Манчестер Сити»да ўтказиб, инглиз клубида ўн йил давомида ўйнаган.
Эслатиб ўтамиз, пайшанба куни Испания Кубоги ярим финалининг илк учрашувида «Атлетико» «Барселона»ни 4:0 ҳисобида йирик мағлуб этди.