Моуриньо «Реал» даври ҳақида гапирди ва мухлисларни эслади

«Бенфика» бош мураббийи Жозе Моуриньо Мадриднинг «Реал» клубидаги фаолияти ҳақида фикр билдирди. Бу ҳақда euro-football.ru хабар беради.

Мутахассиснинг айтишича, у «Реал»да ишлаган йилларида ҳам муваффақиятли қарорлар, ҳам кутилганидек чиқмаган жиҳатлар бўлган. Шунга қарамай, Моуриньо ўз имкониятининг барчасини ишга солганини таъкидлади. Унинг сўзларини The Touchline келтирди: «Реалдаги ишларимда нимадир ютдим, нимадир ютқаздим, аммо қўлимдан келган ҳаммасини бердим. Реал мухлислари мени ҳануз ҳурмат қилади ва айнан шунинг учун қадрлайди».

Моуриньо «Реал»ни 2010–2013 йилларда бошқарган. Ўша даврда «қироллик клуби» Испания чемпионати, Испания кубоги ва Испания Суперкубогини қўлга киритган.

17 февраль, сешанба куни «Бенфика» ва «Реал» Чемпионлар лигасида ўзаро учрашади. Аввалроқ Моуриньо «Реал»га Чемпионлар лигасидан чиқиб кетишини тилаган, бироқ Ла Лигада чемпион бўлишини истаганини айтганди.